Eis Offeren
"Maturitéit ass d'Fäegkeet, eppes ze maachen, obwuel Är Elteren et Iech recommandéiert hunn."
Oppe Wunnengsformen
TÉLOS proposéiert de jonke Locatairë vum SLEMO :
- Ënnerstëtzung bei der Organisatioun vum deegleche Liewen, der Finanzverwaltung, der Zäitplanung, dem Entretien vun der Wunneng asw.
- Begleedung bei déi Servicen an Administratiounen, déi fir Aarbecht, Formatioun a Sozialhëllef zoustänneg sinn, bei gläichzäiteger Fërderung vun der Autonomie
- En oppent Ouer bei perséinlechen, tëschemënschlechen a familiäre Schwieregkeeten an, bei Bedarf, Weiderleedung u Spezialisten
- Encouragement an Ënnerstëtzung bei all de Liewenspläng
- Eenzellogement oder Wunngemeinschaft
Eise Service fir betreit Wunnen ëmfaasst och eng Opnam a Betreiung fir jonk Mamme mat hire Kanner. Niewent der administrativer a psychosozialer Ënnerstëtzung vun der Mamm bidde mir hir och eng Ënnerstëtzung an hirer edukativer Roll un, ouni dobäi hir Roll als Mamm anzehuelen.
Offere fir Familljen
De Service bitt eng psychologesch, sozial an edukativ Betreiung vu Famillen:
- Elteren, déi mat Bezéiungs- oder Erzéiungsschwieregkeete mat hire Kanner konfrontéiert sinn, hëllefe mir, eng kloer, konsequent an ugemooss Haltung am deeglechen Ëmgang an der Famill ze entwéckelen.
- Mir ënnerstëtzen d'Eltere bei de Kontakter mam Hëllefsreseau, wouduerch eng gedeelt Responsabilitéit gefërdert ka ginn (schoulesch Ënnerstëtzung, Maison-relaisen, Noperschaftsservicen asw.).
- Mir hëllefen der Famill, Lienen zu aneren Hëllefspersounen an hirem Ëmfeld opzebauen.
De soziotherapeuteschen Zentrum X-Track
Eisen CST bitt eng alternativ Schoulbildung fir Kanner, déi Schwieregkeeten an de Beräicher Ausdrock, Verständnis a Kontroll vun den Emotiounen hunn. D'Symptomer, déi mat dëse Schwieregkeete verbonne sinn, kënnen et zäitweileg onméiglech maachen, eng Grondschoulklass ze besichen.
- D'Kanner si wärend den Unterrechtszäiten am CST present.
- D'Betreiung, déi ugebuede gëtt, ass pedagogesch, didaktesch an therapeutesch.
- Léiere gëtt als en interaktive Prozess tëschent dem Kand a sengem Ëmfeld betruecht. D'Methoden an d'Ziler ginn dofir kontinuéierlech un de Kanner hir Besoinen an Interessien ugepasst.
- Dem Kand seng Bedeelegung um Entscheedungsprozess fërdert d'Selbstbewosstsäin an den Engagement.
Wunnheemer fir Mannerjäreger
D'Betreiung riicht sech u Kanner am schoulflichtegen Alter. Et kënne maximal véier Kanner opgeholl ginn. D'Haiser huelen Geschwëster op. Well e Placement a sech schonn en Trauma ass, wëlle mer esou wäit wéi méiglech verhënneren, datt Geschwëster getrennt ginn.
- Mir bidden e strukturéiert a strukturéierend Liewensëmfeld, dat op dem Kand seng Besoinen zougeschnidden ass, a seng Eenzegaartegkeet respektéiert.
- Eng friddlech Atmosphär, gutt Laun an en allgemengt Klima, dat d'Wuelbefannen an net d'Organisatioun an de Mëttelpunkt stellt, bilden d'Grondlag fir eng gesond Entwécklung vun de Kanner.
- Duerch geziilt a pedagogesch fundéiert Aktivitéite gëtt d'Kand bei der Entwécklung vu senge sozialen, bezéiungsorientéierten, emotionalen a sozial-emotionale Fäegkeete gefërdert.
Individuell Intensivbetreiung - TELOS ESPACE
Wann e Jugendleche fir e bestëmmten Zäitraum de Besoin huet, aus sengem gewinnte Liewensëmfeld auszebriechen, fir nei Kraaft ze tanken a sech op sech selwer ze konzentréieren, bzw. fir iwwer säi „Liewensprojet“ nozedenken, bidden eis individuell pedagogesch/therapeutesch Projeten d'Méiglechkeet, eng „Bulle“ oder e „Raum“ fir dës Erhuelung ze schafen. Déi raimlech Dimensioune vum Land loossen e groussen Eloignement bannent eise Grenzen net zou, obwuel en Tapéitewiessel, z. B. vun der Stad op d'Land oder an eng méi ofgeleeë Regioun oft als positiv ugesi gëtt.